Bänke

2023

Immer wenn ich hüt nöimed ine gaa Lueg ich wievil kulturelli Aaeignig isch öppe da. Verbündeti z haa macht ebe na Sinn will i sèlber kèn èchte Sangaller bin.

Was i momentan lustigs könnti verzelle: I ha mini Stüürerklärig mahha welle. Es isch uu huara nit viil ussa koo. Jetzt muass da Vasella allai uf Monaco.

Suscht git‘s fast nüüt me zum Lachen, ich säg es grad use. Was nöd alles passiert isch, es isch zum gruuse. De Ueli haut z Bern obe Hals über Chopf ab. De Alain macht wahrschiinlich demnächst schlapp.

Au de Paul hät sich denkt, dass es öppe Ziit sei, Suscht seg d Schepanese na vor ihm de hei. Und z Bern weiss niemert me, wie‘s wiiter gat, wènn die Boum - Schneider nöd e mal Englisch verstat.

Schwarzi Schaf sind, wie mer weiss, für d SVP. So öppis wien e Gottesstraf. Boum - Schneider hät drum gsait, ok: Probier i‘s halt mit Schwarznaseschaf.

Wie wär‘s mit’ere K und K Monarchie? So mit Chronen und Thron, wär na läss. S mues nur es S für’d Schwiz dra sii. Scho si‘ mer e KKS.

Jetzt sind bi üüs au na d star wars uusbroche. Mer weiss schint’s scho, worum das gaat. Hät6 sich s letsti Sternli verchroche, lüchted d Frau Friedli im Ständerat.

Z Katar de Abdul Al-Aziz Al-Khazraj Al-Ansari, sait das mit dem Gender sei all‘s larifari. Und dass es au hüüt na guet ooni gaat. Mer mues nur wüsse wie mer d Frau richtig schlaat.

Ein hät sinere Alten e paar Zäh usgschlage. Die isch grad bi de Kesb go chlage. Er mües sich verbessere, heisst‘s det klar. Jetzt fahrt er statt em VW en Jaguar.

Die Katholisch Chilen isch au nümme fit. S einzig wo na lauft sind Chillenuustritt. Si säged zwar cool, s chöm gar nöd druf aa. Hauptsach de Letst wo na bliibt isch en Maa.

Bim Trump händ‘s gheimi Dokument entdeckt. De Biden heg au sottig i de Garage versteckt. Die Amis händ irgendwie zimli en Tick. Bi üüs bringt mer so Züüg direkt am Blick.

De Putin hät am Macron grad na versproche, D Russe falled z Frankrich sicher nie ii. Churz druf händ‘s gmeint, de heg sis Wort broche. S isch denn aber nume de Berset gsii.

Ich han im Fall fast scho chlii e Phobie, dass das won i säge nöd woke chönt sii. Bim Dürrematt hät mer‘s grad scho gsee, de wür jetzt zum Trotz au i d SVP.

Mit dere cancel cultur cha‘s eim au na ver -s-c-h gaa. Am End isch mer selber sones Wort mit A. Und wotsch denn nöd na es N-wort sii, Gheisst s chasch di‘ F-wort irgendwo hii.

Und im Winter hät’s meistens e kè Schnee. Das isch au fängs e rèchti Plag. Z Sangalle het‘s zwar na e chlii mee, aber de isch i de Kläralag.

Mer söll weniger heize i dem Jahr und mit em Warmwasser nöd güddle. Es isch bis hüt na nöd allne Lüt klar, zum an Arsch früre brucht‘s au Füddle.

Es isch füüf vor Zwölfi ihr Liebe, dènked draa. Ich säg es eu, d Ziit wird knapp. Und wä mer dänn nuna 30 faare cha, isch es dänn schnell scho füüf ab.

Und z Brüssel die Gauner, Schweinerei. Ein riise grosse Bschiss. S einzig wo det na beruhigend sei, Die sind nöd vo de Credit Suisse.

Was isch vo üsere Bildig na bliibe? Hät de Peterli doozmal am Fritzli abgschribe, hät‘s e paar hinter d Ohre gee. Jetzt isch er Professer a de HSG.

De Geist wird trainiert a de HSG obe. Bim Volch hät s Handwerk goldige Bode. Jetzt hät sich aber letsthin zeigt, au en Manager weiss wie mer Hand aalait.

Schmid Bratwürst chömed jetzt us Appezell. Wo bliibt da bloss na d Pietät? Es goot dänn wellewèg erba schnell, dass me gad ono Badwoost säät.

D Migros hät es Wiener Schnitzel lanciert, wo mer als Pulver is Wasser ie tuet. Es wird dänn wie Plastilin modeliert und s isch au fast e so guet.

Bim Stüüramt Sanngalle isch mer siit Jahre scho muff. Die Riichi gönd uf Mörschwiil, mer hät‘s langsam satt. Git‘s jetzt am End det au na es Puff, chömed‘s denn allwèg gar nümmen i d Stadt.

Nei, es gaat nüt über üsi Kultur. Mer cha‘s e fängs überall gsee. Stinkt‘s bi den andere wie Schiisdräck pur, schmöckt‘s bi üüs wie grüene Tee.

Das mit em Bumbum Becker isch au son e story. De mues also gar nöd go jammere. E Gfängnis - Zällen isch doch emel, sorry, grösser als e Bäsechammere.

Zum Schluss na öppis won eim chan erfreue. Mer mues es sit churzem nümme bereue, wä’ mer blase mues und mer hät e chlii zvil. Überfahrt na es Rotlicht, wenn‘s de Zuefall so will. Oder wür‘s sogar en Fuesgänger si. Dänn gseesch mit voller Garantie: Hinter schwedische Gardine, Macht kèn Mensch e suuri Mine. Au dinnen bisch unter de bessere Lüt. Freiheit isch nüt me bsunders hüt, Wasser und Brot chasch getrost vergesse. Im Knast wird jetzt au a la card gèsse.

2021

Mir mached hüür Sprüch wie jedes Jahr. Öppen eine isch gspune, öppen eine isch wahr. S einzig was mir beschlosse händ, über was mer ganz sicher nöd rede wänd.

Es betrifft im Fall nöd s Verhülligsverbot. Das hät zwar scho au siini Not. Wänn d fridlich in e Bank wotsch gaa, gheisst s leged sii bitte e Masken aa.

Ich hoffe, sie verstönd mii rècht. Eis Thema weniger isch nöd schlècht. Dass de Zombi s Wiisi Huus verlaat, findet eigentlich nur de Köppel schaad.

Über de Stadtrat z reden isch nöd untersait. Öppen eine chunt zwar immer nanig drus. Mer hät s doch scho so mängisch gsait: Präsident isch jetzt mit -in am Schluss.

D Spitöler wäred scho na vo Intresse. Mer tuet s im Moment aber lieber vergèsse. Die händ, wie s gheisst e so vil z tue, drum mached s demnächst e paar zue.

Immer mee Lüt chömed uf de Hund. Das tüeg eim guet und seg au gsund. Was i dem Fall en Nachteil isch: Er chunt fast nur na z China uf de Tisch.

D Frau Meier macht en riise Terz. Si well iren Maa go verchlage. De heg tatsächlich, ohni Scherz, iren Nerz im Garte vergrabe.

Ich mag nüt säge über die arme Seele, wo schimpfe tüend und umekrakele. Was alles git und nöd dörf gee. Z Gossau zum Biispil e so vil Schnee.

Herr, hilf üüs üseri Gilde z erhalte. Nur mir chönd de Nèbel na spalte. Mir mached das für Gotteslohn, tuusig mal besser als de Soom.

So, jetzt bin i schoo am End. Schön wien ir glached und klatsched händ. Beiz isch voll, so wie‘s söll sii ... Das wär im Fall e Pointe gsii. .

2020

Fremdi Chräps sind i üüseri Gwässer immigriert. Arabischi Muschle händ de Bodesee okkupiert. Di Iiheimische händ kè Platz me, es mues öppis gschee. Aber weit und breit e kei SVP.

De Trump hät s Wassersparen uf em WC untersait. Die Entscheidig isch jetzt also würklich gschiid gsii. De Dreck mues use, hät de sich überlait. Und s Oval Office isch bi dem halt ebe d Schissi.

Z Bern obe fanged s glaub langsam a spinne, Wèg dere blöde Spionagemaschine. Die sölled doch stolz sii, es isch nämlich e so: I dem Fall si mir d Erfinder vo Facebook und Co.

Autobahnbrugge, s blank Entsetze. Zig Tuusig müesseds subito ersetze. D Italiener sind was das betrifft die Schlaue. Müend wenigstens die Alte nöd abbaue.

Im Dütsche hät das Liedli schwer schockiert: Üses Omi isch en alti Umweltsau. Mer hät de Text drufabe korrigiiert. Si müend jetzt singen üsen Opa au.

Es isch mir da na sehr dra glège, öppis über d Demenz und öppis über s Klima z säge. Ich fang mit de Demenz a, das Thema kènnt jede ...

... und über was han i gsait, well i suscht na rede?

Klimakatastrophe, was saisch dezue? Temperature gönd immer me ue. Bilderbuechwetter, wie jede Tag Föhn. Nei ehrlich, das isch doch huere schön.

Hät s Mugge ghaa, hät‘s öppe wee ta. Usser häsch sie vorher gsee ghaa. Jetzt git s e sone Mugge, die chasch nöd go verdrucke. Die gheisst jetzt ebe Greta.

Ei Milliarde Tier, es isch unghüür! Verbrenned z Australien, det im Füür. Si säged, mer mües das positiv interpretiere. Si seged jetzt Weltmeister im Grilliere.

Bim Flügen isch au nümmen alles commilfo. I letster Ziit isch d Flugscham cho. Und s gross Problem wo s bi de Boeing händ: S git chum na Lüüt wo abstürze wänd.

Und dänn isch da au na die Sach mit dem C. Grundsätzlich wär s allwèg scho na ok, Wè mer s wür us em Name striche. D Frag isch, was wür dänn na übrig bliibe.

Chunsch lieber nöd wèg sexuellem Übergriff dra, söll sch zum andere Gschlècht ein Meter zèè Abstand ha. Im Ehebett, und i de Büss und Bahne, git s während de Stosszyt gwüssi Uusnahme.

Häsch es Auto kauft, debii chasch gar nöd fahre. Pensionskasse verchlöpft, als Beizer, i knapp zwei Jahre. Für s Huus nöd d Helfti wo d zahlt häsch übercho. Dänn chasch als Manager zu de Migros

Schiis Häfeli. Schiis Teckeli, bi de Credit Suisse. Hät s de gwüsst, oder dise, s isch überal de glichi Bschiss. Im Thurgau de Schafbock behauptet jetzt au hine drii: De Sex mit dem Buur seg nöd iivernehmlich gsii.

Wie mer bi de Raiffise e halbi Chiste kassiert. Mit Abzocken zè Tuusig Stutz Buess riskiert. D Studenten chönd sich das a de Uni la zeige. Ob s Gauner wänd werde, müend‘s denn sèlber entscheide.

Wègem tüüfe Stürfuess i der Aglo Laufed d Lüüt de Stadt in Schare devo. Jetzt händ‘s e Methode zum die zrugg pffiife: Si lönd s Appezellerbähnli dur d Kurfe schliife.

Bim Marktplatz, die Parkplätz, sind kè Parkplätz me. Und d Stadt well demnächst au na dure ge, wie mer als Fahrer ècht usefind, dass die Parkplätz kè Parkplätz me sind.

Das mit de Spitöler schlüssen isch würkli trurig. Sött sch in Spital und s hätt kèn, s isch schuurig. Emotional chan eim das gwaltig uufwüele. De Federer wür sogar gratis brüele.

Wènn d i some Bombardierzug gern öppis würsch esse, Isch s Restaurant all pot zu und chasch es vergèsse. Bi de SBB gheissts, kèn Grund zum Uusraste. Das seg es Programm zum Intervallfaste.

Am Gotthard hätt die Bahn e schlächti Falle gmacht. En Huffe Lüüt wo mit händ well, händ s nöd inebracht. Künftig säged s, dass all Lüüt mit nè chönd, wènn s die Wäge nèmed, wo d Türe nöd zue gönd.

D Chind mit em Velo uf em Trotoir, wird diskutiert. I de Press isch gstande, die Blinde heged reklamiert. Son en Seich go schribe, isch also würklich blöd. Die Blinde gsèched doch die Velofahrer nöd.

De Gofe gebed s schint s kei Ufzgi me. Früener händ s eim gè dass nur so kracht. Und dänn häsch sèlber chöne gsee, wie mer s am beste nöd macht.

Wenn s vegan isch, schriebt mer Fleisch mit V. Bim Fisch ohni Fisch drin gat das au. Mit F gschribe chunt de Vogel uf de Tisch, wenn im Fleischvogel Fleisch mit Vau drin isch.

Min letste Spruch isch nöd zum Lache. E son es Versli chan i nie mee mache. Mis schönsti Thema, es ist für immer dahin, wenn s gheisst, mir landed im Flughafe Berlin.

Das mit de Negativzins han i nanig rècht gschnallt. D Bank nimmt‘ s Geld nur, wä mer öppis zalt. Wänn‘d bringsch, muesch zale, das isch doch wie gstolle. En Dieb chunt‘s wenigstens gratis go hole.

Es grünt so grün, wenn Spaniens Blüten blühn. Und isch es nöd z Spanie, isch es au schnurz. Z Östrich blüht‘s jetzt au so grün. Und singe tuet‘s de Kurz.

Im Swissair Prozess händ‘s endlich d Urteil gsproche. Nie heg niemert nöd öppis mit Absicht verbroche. Und de wo Kaffikasse gschnifft heg am Grounding Morge, seg altershalb vor zèh Jaare scho gstorbe.