Fasnacht 2008
- Dènk'sch im Nachhinein na schnell,
- Bundesrat sii isch e Schur.
- Am einte gaat's total as Fell
- der anderen a d' Frisur.
- Es nimmt ja niemert würklich aa,
- dass's de Blocher us de Schue haut.
- Mer ghööri zwar scho hii und da,
- er liidi zimli unter Bern - out.
- De Spueler, ganz en gschiide Siech,
- fast wie de Diogenes dè Griech,
- hät gsait, mer heg sis Hirni nöd zum Gspass.
- Iezt läb' de Toni Brunner im e Fass.
- De Brunner sait, es seg nöd dumm,
- e sones Copräsidium,
- heg er im Stall scho früener ghaa,
- det laufed d Vicher au am stärchste naa.
- Wer wird blos Regierigsrat, wer.
- Füüf stat sibe wär de Hit.
- Für d SVP wär's halb so schwär.
- Si nääm die zwee wo's nümme git.
- Det händ's Französisch ab de dritte Klass.
- Und Englisch machi disne Spass.
- Nur d SVP chön sich nöd dra gwönne.
- Mer mües doch zerst uf drüü zele chöne.
- Will mer für Fèèltritt Bewiis mües haa,
- wird 's Stadion mit Video bewacht.
- Iezt fröög ich, wür's um en Fèèltritt gaa,
- wänn Sanggallen e Chiste macht.
- Der Öhler hät, das isch beleit,
- am Sadam do scho d'Meinig gsait.
- Da brucht's halt nöd vil und es langed,
- das au bim FC e paar hanged.
- S hät eim fast dünkt, s'seg ungefär,
- wie wänn wider e Papstwaal wär.
- Abertuusigi händ welle gsee haa,
- wie de Haag verchünd't: Habemus Ikea.
- Mer ghöört's vo üüs bis i d'Türkei.
- Mer säg's sogar am Hindukusch.
- Syt de Blair katholisch sei,
- glaubi niemert me an Bush.
- D Frag isch nöd, verlönd de Bush die letste Geister,
- oder werded mir Europameister.
- D Frag Nummer Eis isch, wür'i wette:
- Cha mer ächt de Cervelat rette?
- Robi dog händ hüt zum Zwèkk
- d Besitigung vo Hundedrèkk. -
- Cha mer dèè Drèkk so besitige,
- gieng's doch au bi Gratiszytige.
- Frögsch di, was sind das für Wèse,
- wo jede Seich mönd füüf mal lèse.
- Wer so vil Mist wot gratis haa,
- wür gschiider uf Neapel gaa.
- Au Hpothekegschäft, mer ghört vom Übel,
- wandered in letzter Zyt in Chübel.
- Ein Vorteil hätt säb prinzipiell,
- d'Besiitigung isch virtuell.
- Wènn'd en Chindergärtner frögsch was choscht,
- sait er tuusigmillionesibe.
- Da dènksch doch eerlich sapperlot
- d'UBS isch d'Antwort schuldig blibe.
- Die Dütsche Bäänler gänd iezt Rue.
- D Monetslöön gönd chräftig ue.
- Will mer aber drum mües spaare,
- sölled Züüg iezt ooni Lokki faare.
- Es isch e soo, nei losed sii,
- die Sach da mit dem Sarkozy.
- Bim Rindvii wär iezt das de Muni
- und d'Chue isch ebe halt e Bruni.
- Nei, füüf Minute Liechterlösche, gopf.
- da lang't sich selbst de Spaarbewusst' an Chopf.
- Bi zèè Minute chönt's ja villicht giige,
- das Geburterate effektiv wür stiige.
- In Schwede welled d'Fraue bare Brust
- is Halebaad. Si streikked suscht
- im Bett. Leged's iri Chleider aa.
- Für öppis wènd's Klamotte gliich na ha.
- Aadie, s nächst Jaar bin i wider daa.
- hät miin Vortrag allne gfalle,
- han ich als Narr me Glöggli ghaa,
- als de Trainer vo Sanggalle.