Fasnachtsprüche 2007
- Muesch gar nöd asen eige tue.
- Ich bin en alte Narr, ich staa dezue.
- Wènn di trausch, bring d‘Fakten uf de Tisch.
- Gib zue, das au es halbs Ersatzteillager bisch.
- Es künstlichs Chnüü, und d Hüft isch au scho cho,
- S Cholesterinproblem kännsch sowiso.
- Frögt sich nur, wie mir na sterbe wänd,
- wè‘mer s‘Passivrauche nüme händ.
- En Einheitskasse wär doch blöd.
- Das lööst s‘Problem bi wyytem nöd.
- Am gschiidste wär, da mach i jedi Wett,
- wä mer en Einheitschranket het.
- Wänn‘s pfiift im Oor, gheisst‘s Tinnitus.
- Mit dem Befund isch künftig Schluss.
- Und wènn‘s dänn gliich na pfiiffe set,
- wär sèb dänn s Gratisinternet.
- Mer hokkt vor d‘Glozze und mer gseet,
- Cablecom und Cable - geht.
- Die Leuthard hät ja au e Schiibe,
- Vaterschaftsurlaub, s isch nöd zum fasse!
- Was wür en Maa dänn da so triibe?
- De ganz Tag s Auto wäschen oder jasse?
- Am Blocher cha mer sich es Biispil nèè!
- Wènn‘s sich nämlich wür ergee,
- das er nüme z Bern chönt würke,
- gieng de schnuerstrakks zu de Türke.
- Wer en grosse Horizont wot ha,
- mues uf es Minaret ue gaa.
- De Murer sait, nur schwäzze laa,
- wènn‘s schwäzze wänd, die Lingge.
- Si sèlber seged besser draa,
- en Gaisbock mües nur stinke.
- Z Östriich sind die Rote sauer,
- nüt me grosse Rüssel.
- De Kanzler gheisst iezt Gusenbauer
- und regiere tuet de Schüssel.
- De Schwyzer laufts am Lauberhorn
- dank em Kunstdünger enorm.
- Iezt welled‘s das na opptimiere
- und mit Chuemist uusprobiere.
- Statt Eschpemoos gheisst‘s AFG
- Si jammered, das tüeg so wee.
- Ja, sind die nöd vo dere Wèlt?
- AFG ggheisst Alles Für Geld.
- Riist en Hund driisg Schöf isch aus,
- e so eim mached‘s de Garaus.
- Da kombiniersch und dènksch, der Akkermaa,
- hät allwäg e kèn Chip im Ranze ghaa.
- Als Uusländer z Sanggalle Stüre zale,
- wür eim, genau gsee, au na gfalle.
- Zum senke vo de Eigemietwertchoste,
- chöntsch am Wienachtsmarkt es Hütli poste.
- Nöd lache Lüüt, de Tipp isch heiss,
- de Weigelt heg iezt au so eis.
- Die Dütsche händ uf Hartz Vier e Wuet.
- De Fèèler vom Exkanzler Schröder seg‘s.
- Gwerkschaft sait zwar hüt na seg guet,
- suscht gäb‘s ja schliesslich nöd Hartz Sex.
- D Frau Meier lüüted der Uuskunft aa,
- si het so gern es Nümmerli ghaa.
- Wo‘s gheisst das dete d‘Füürweer sei,
- sait sii: Es langed einen e lei.
- Und wie sich‘s ghöört, iezt na en Tusch,
- für de Tschortsch Dobbelyuu Busch ...
- ... mir sind e paar Sekunde still,
- s‘wär nämlich jedes Wörtli z vil.
- Z Amerika chasch i de Büecher läse,
- de Mènsch isch s Werk vome höhere Wèse.
- Sèb heg e mal gsait, lass d Finger devoo,
- und drum isch de Bush e so use choo.
- Wènn‘s gheisst, das d Mènsche liide mönd,
- will d Chüe z vil Drèkkluft use lönd,
- isch das en èchti Chalberei.
- d‘Rindvicher händ nöd nur zwei Bei.
- Chunt en Bär vo Oste hèr,
- hät‘s de Bär in Bayern schwèr.
- Kummt a Bayer aus Berlin,
- is ää der in Bayern hin.
- Wänn iezt na öpper d Fraag söt haa,
- öb en Zürcher als „Narr vo Sanggalle“ dörf gaa,
- säg ich dezue, momol das gaat,
- das isch s Orginal, und z Züri händ‘s es Duplikat.
- Au d Regierig hät ase Kulturguet verschobe
- und säb sind dènk sicher kä Narre det obe.
- Es hät det zwaar scho na öppen en Gloon
- drum händ‘s iezt au wäärend de Fasnacht Session.
- Sölled's nöii Gsezz erlaa
- und mit de rote Nase sparre.
- S cha gar nüüt i d Hose gaa.
- Regiere tüend hüt nämmlich Narre.